حلَّ نجم “مسرح مصر” الفنان محمد أسامة الشهير بـ”أوس أوس”، ضيفاً على بودكاست “فضفضت أوي” الذي يقدّمه المخرج معتز التوني على منصة “watch it”، حيث كشف كواليس القبض عليه أثناء تواجده في إيطاليا، خلال تصوير فيلم “رمسيس باريس” من بطولة الفنانة اللبنانية هيفاء وهبي.
وقال “أوس أوس”: “كلّموني في فيلم “رمسيس باريس” وكان محمد ثروت عنده مشكلة مش هينفع يسافر وقالولي أرجوك تعالى، طلعت الفيزا وصبغت شعري أزرق وحضّرت نفسي، ولأن الشينغن كنت مطلعها لإيطاليا سافرت على إيطاليا الأول وبعدها قلت أسافر داخلي لباريس، نزلت إيطاليا كان يوم 2 يناير مفيش حد في المطار غير أنا والناس اللي في الطيارة وكان وقتها كورونا”.
“أوس أوس”: “حطّوني في غرفة كلها ناس محبوسة”
وأضاف: “وأنا داخل سألني شخص أنت ليه جاي هنا؟ رديت أنا كل سنة بآجي إيطاليا مكنتش عايز أقوله إني ترانزيت ورايح فرنسا عشان عايز آخد ختم دخول إيطاليا عشان تبقى الدنيا أمان وبعدها أسافر داخلي، سألني هتقعد فين قلت له صديقي مستنيني ورا المطار قالي أوكي، وجه ظابط وقالي اتفضل معانا وأنا مش فاهم في إيه وهما واخدين باسبوري، رحت معاهم، ودخلت أوضة كلها ناس محبوسة قلت سلامو عليكو يمكن ألاقي أي حد عربي مفيش وهما شكلهم مرعب وقعدت مش عارف هعمل إيه”.
وتابع: “جالي الظابط جايبلي ورقة كبيرة بالإيطالي المفروض أحلّها، اللي اكتشفته إني جاي بفيزا سياحة وهما قافلينها فكل اللي كانوا معايا دخلوا لأنهم تعليم أو إقامة لكن أنا معايا سياحة، أنا طلعت الفيزا من القنصلية لأن الدنيا كانت قافلة وأخدتها سياحة، الظابط قالي كلّم صاحبك اللي واقف برا، قلت له إني معيش رصيد، راح واخد موبايلي ووصله بإنترنت المطار وطلب مني أكلّمه أونلاين”.
واختتم “أوس أوس” حديثه بالقول: “كلّمت الراجل اللي في القنصلية اللي أنا رحت له هو مصري وبيتكلم إيطالي، قلت له أنا في إيطاليا قالي إيه اللي ودّاك إيطاليا أنت مش قلتلي عندك فيلم في فرنسا؟ قلت له أيوه، قالي ما الشينغن دي بتدخل أي بلد، قلت له ما أنا خفت وقلت لازم آخد ختم، راح كلّم الظابط وقاله إني ممثل مصري ورايح أصوّر في باريس وجاي أقعد يومين في إيطاليا عشان متعود، قالوله أوكي ومشيوا وبعدها الظابط رجع وختم لي الباسبور وقالي هما بس يومين”.
شارك
