حلّت الفنانة ياسمين الجيلاني، ضيفة على برنامج “كلام الناس” الذي تقدمه الإعلامية ياسمين عز، على قناة mbc مصر، حيث تحدثت عن طلاقها من الفنان عمر خورشيد، بعد سنوات طويلة من الزواج، موضحة أن خبر طلاقها أُعلن دون اتفاق مسبق، كما ردت على تشبيه الجمهور لها بالفنانة شريهان، وكشفت عن سبب غيابها عن الساحة الفنية طوال السنوات الماضية.
وقالت ياسمين الجيلاني: “خبر انفصالي نزل على السوشيال ميديا وأنا معرفش، وقلت طالما ده اتكتب يبقى صح، وإحنا كنا منفصلين قبل الإعلان ولكن مأعلنتش للإعلام، ليه نعلن وقت الطلاق؟، مكنتش حابة أن الخبر ينتشر والتزمت الصمت وسيبتها لربنا”.
وأضافت: “كل واحد بيتعامل بطبيعته، أنا بتعامل بطبيعتي ونيتي وربنا يدي كل واحد على قد نيته”.
وعن تفاصيل وسبب غيابها خلال السنوات الماضية عن الساحة الفنية، قالت ياسمين الجيلاني: “كانوا فاكرين إن في حد منعني وأنا مفيش حاجة تقدر توقفني إلا رغبتي الشخصية، وأنا اخترت إني أقعد لأني رفضت ناني تساعدني في تربية بنتي، وأنا كنت حابة أحط التقاليد بتاعتنا وأتفرغ لبنتي”.
ياسمين الجيلاني: قررت ألا أجعل ابنتي تشعر بحرماني من والدتي
وتحدثت ياسمين عن تربيتها لابنتها قائلة: “لما كنت طفلة والدتي كانت مشغولة عني كتير ومش متواجدة، وأنا كنت بحس بالفقدان وإنها مش موجودة معايا وبشتاق لها، وقلت أنا مش هيعش بنتي الإحساس ده وعوضت ده على قد ما أقدر، إحنا هنتحاسب على ولادنا، إحنا جايبين الأطفال علشان نوحدها؟، بدأت أفكر أرجع للشغل وأمهد ده لبنتي وأنا وهي أصحاب جدًا ونادرًا لما تقولي مامي، ولازم أنا أصاحبها وأقرب فكري من فكرها لأنهم جيل مختلف تمامًا”.
كما تطرقت ياسمين الجيلاني، للحديث عن والدها الراحل، قائلة: “والدي رحمة الله عليه، كان منفصل عن والدتي ومكنش موجود في حياتي، ولكن ده لا يمنع إن حس والدي في الدنيا كان بيخليني أحس بالأمان، كان بيزورني طبعًا وكنت بشوفه”.
أما عن تشبيهها بالفنانة شريهان، فعلقت ياسمين قائلة: “اتقالي كتير جدًا أني شبه شريهان، وجت عليَّ فترة غيرت من شكلي وشعري، وأنا مبحبش حد يتشبه بحد لأني كده بسلب شخصيتها، ولكن دي حاجة بتسعدني جدًا ومكانها محدش هياخده منها وهي جميلة”.
شارك
