اشتعلت حرب التصريحات بين الفنانين شريف إدريس ورضا حامد بعد تصريحات الأخير عن رفضه العمل مع الزعيم عادل إمام بعد مسرحية “بودي غارد”، والتي أكد فيها أنه ترك المسرحية بعد خلافات مع الإدارة بسبب أن عادل إمام غار منه لأنه كان يضحك الجمهور أكثر منه، وأنه ترك العمل في المسرحية بإرادته.
وفاجأ شريف إدريس، الجميع بالكشف عن حقيقة الأمر حيث نشر على حسابه الخاص بـ”فيسبوك” منشوراً تحدث فيه عن كواليس ما حدث في المسرحية، كاشفا السبب الحقيقي لطرد رضا حامد من المسرحية.
وكتب شريف قائلاً: “فيه ممثل زميل كبير سنًا.. بقاله فترة طويلة جدًا كل ما يطلع في لقاء يقول إن الأستاذ عادل إمام مشاه من مسرحية بودي جارد علشان كان بيضحك أكتر منه، طيب لأول مرة هحكي الواقعة اللي حضرها ناس كتير عايشين معانا في الدنيا”.
وأضاف: “في واحدة من ليالي العرض الجميلة الزميل الممثل كتب رقمه في ورقة وحدفها لواحدة معجبة في الصالة خلال تحية العرض، شافه حد من بتوع أمن المسرح وراح بلغ الأستاذ عادل إمام، تاني يوم كان أستاذ عادل قبل العرض بيقعد يوميًا في الأوضة اللي بقعد فيها أنا وزمايلي الممثلين بنقعد ندردش شوية قبل العرض”.
وواصل شريف إدريس: فجأة الزميل دخل من باب المسرح ومعاه واحدة غريبة وفي حالة يرثى لها هما الاثنين، فالأستاذ عادل قال لمساعده مين دي وعرف إنها نفس الشخصية اللي حدفلها الرقم فبعت جابه وقام معاه بالواجب، وطبعا أستاذ عادل أخد موقف في لحظتها ودي كانت آخر ليلة عرض لهذا الزميل الممثل في مسرحية بودي جارد”.
واختتم شريف إدريس: أنا أول مرة أحكي الواقعة بس حقيقي الوضع بقى مستفز وياريت الزميل الممثل يحترم سنه وعيب إنه يطلع يكذب على الناس”.
رضا حامد يكذّب شريف إدريس ويوضح حقيقة طرد الزعيم له
من ناحيته كذب رضا حامد ما جاء بمنشور شريف إدريس بشأن طرد الزعيم عادل إمام له من مسرحية بودي جارد بسبب سوء أخلاقه، قائلاً: “أنا الحمد الله ملتزم ومعرفش حاجة اسمها سُكر وعارف ربنا وبصلي الفرض في ميعاده، والناس دايمًا بتقولي إنت فنان محترم”.
وأضاف: سيبت مسرحية بودي جارد بسبب خلافات مع الإدارة مش علشان عادل إمام طردني كما يشاع”.
ليرد عليه شريف إدريس في منشور آخر، قائلاً: “طيب آخر حاجة هكتبها في موضوع الزميل، رقم واحد أنا لم أتطاول عليه بحرف، ثانيًا يشهد الله أنني لم أفتري عليه بحرف، لو هو شايف إني افتريت عليه في حرف واحد يروح يقاضيني، وأنا مستعد أجيب المسرح كله يشهد على الواقعة.
وتابع شريف إدريس: أظن في التعليقات في المنشور اللي فات فيه ناس كانت حاضرة الواقعة، كتبت تعليقات تؤكد حدوثها، وأنا مستعد لكتابة أسامي كل من حضر الواقعة من الزملاء الفنانين، ومستعد أعملهم تاج ومينشن في المنشور، بس أنا مش عايز أحرج حد، وأنا لما كتبت البوست اللي فات كتبته من كتر ماشوفته في برامج بيطلع يكذب ويفتري على أستاذ عادل إمام، وده كله موجود على يوتيوب وجوجل.. شكرًا لحضراتكم الموضوع بالنسبالي اتقفل تمامًا”.
شارك
