حلّت الفنانة شاهيناز ضيفةً على برنامج “اسمعني شكراً”، الذي تقدّمه سارة إبراهيم على “يوتيوب”، حيث كشفت سبب غيابها الفترة الماضية عن الساحة الفنية، وأسرار مسيرتها الفنية وتفاصيل حياتها الشخصية، مؤكدةً حرصها على التنويع في أعمالها الفنية مع الحفاظ على الطابع الغنائي المميز الذي عرفها به الجمهور، كاشفةً تفاصيل تعاونها مع الفنان محمد رمضان في دويتو غنائي.
وقالت شاهيناز: “أنا كل فترة بحاول أعمل شغل مختلف، لكن مع الاحتفاظ بالاستايل أو الشكل الغنائي اللي الناس عرفوني به. بحاول أواكب الذوق العام شوية، لأن أي فنان من مصلحته أن يستقطب شريحة جديدة من الجمهور. مش هينفع أفضل عايشة مع جيل معين، لأن الجيل اللي من سنّي وأكبر مني شوية هو اللي دعمني في البداية، لكني كمان عايزة جيل الشباب يسمعني ويتفاعل معي، وده اللي بيخليني أقدّم أفكار وأعمال جديدة بتهمهم”.
واستعادت شاهيناز ذكرياتها مع انطلاقتها الفنية من خلال برنامج اكتشاف المواهب الشهير “ستار ميكر”، مؤكدةً أنها خاضت التجربة بهدف تقييم نفسها واختبار مدى تقبّل الجمهور لصوتها وأدائها.
وأضافت: “أنا دخلت مسابقة “ستار ميكر” وكنت بتمنى أفوز، لكن الموسم الأول كان فيه أصوات قوية جداً ومطربين شاطرين أوي. أنا دخلت من البداية عشان أقيّم نفسي، مش علشان لجنة التحكيم، كنت باصّة للجمهور وشايفة إزاي هيتقبّلوني، هل هينبسطوا مني ولا لأ، وهل أكمل في المجال ده ولا لأ”.
ولفتت الى أنها بدأت مشوارها مع الغناء منذ الطفولة، حيث شاركت في كورال الأطفال بـ”دار الأوبرا” وهي في الثامنة من عمرها، موضحةً: “أنا من قبل “ستار ميكر” كنت بغني، بس مش بشكل احترافي، وكل ما المنافسة كانت تزيد كنت بخاف أكتر، لأن كل الناس كانوا متوقعين إن آخر حلقة هكون أنا اللي أفوز، وأنا وقتها مكنتش مصدّقة”.
شاهيناز تكشف كواليس غيابها عن الساحة الفنية
أكدت شاهيناز أن فترة ابتعادها عن الساحة الفنية لم تكن خسارة كما قد يظنّ البعض، بل كانت بمثابة “هدنة إلهية” أعادت خلالها ترتيب أولوياتها ومنحتها نظرة مختلفة للحياة والفن.
وقالت: “الفترة اللي بعدت فيها دي، ظاهر الأمور ممكن تكون تعطيل أو وقت ضاع، لكن من ثقتي في ربنا بشوف إن أفضل سيناريو مكتوب في حياتك هو اللي ربنا كاتبه، حتى لو كان عكس إرادتك”.
وأوضحت أنها كانت على يقين بأن الغياب لم يكن إلا لحكمة، قائلةً: “قلت لنفسي يمكن لو كنت كمّلت في الوقت ده كانت حصلت مشكلة كبيرة في حياتي، أو حاجة في شغلي كانت ممكن تقلّل من محبة الناس لي، لكن الحمد لله أنا بشوفها فترة راحة واستعادة طاقة”.
وأضافت: “كل مرة بكون فيها في حفلة أو فرح بحس إن الناس مش حاسة بفترة غيابي، وده بيدّيني طاقة إيجابية كبيرة. الحمد لله قدرت أعمل بصمة، واللي بيحبني فعلاً لسة موجود، وده واضح من تفاعل الناس مع الأغاني الجديدة اللي قدّمتها لما رجعت”.
شاهيناز في ديو استثنائي مع محمد رمضان
وتطرقت شاهيناز في الحديث الى تجربتها الفنية مع النجم محمد رمضان، فوصفتها بأنها تجربة مميزة وتعتز بها كثيراً، قائلةً: “تجربتي مع محمد رمضان بعتز بيها جداً، لأني من فانزه، وهو فنان جميل ومجتهد”.
وكشفت كيف بدأت فكرة التعاون بينهما، قائلةً: “اتقابلنا من كام سنة في مناسبة تخص أحد الأصدقاء، وبدأنا نتكلم، وكنت أنا اللي اقترحت عليه فكرة الديو. كان لسة بادئ يغنّي، فقلت له تعال نعمل أغنية سوا، وفعلاً اتحمّس وقال: فكرة حلوة”.
وتابعت: “مرت سنة أو اتنين، وفضل بينا تواصل كزملاء، لكني محبتش أكرر الطلب عشان مبقاش زنانة، وده يمكن كان غلط مني، لأن في مجالنا لازم نتابع. بعد فترة لقيته هو اللي بيكلّمني، وفرحت جداً، لدرجة إني قلت له: “ده التليفون نور”.
وأكملت شاهيناز: “قالي عندي أغنية هبعتها ليكي، قلت له من غير ما أسمعها أنا موافقة. سجلناها فعلاً، وكان المفروض نصورها بس هو انشغل بتصوير “جعفر العمدة”، ومع ذلك احتمال كبير يكون في عمل تاني يجمعنا قريب، وساعتها هيتصور إن شاء الله”.
شارك
