خرج مغنّي المهرجانات مسلم عن صمته ليكشف تفاصيل مثيرة عن طلاقه ليارا تامر، بعد مضي أربعة أشهر فقط على زواجهما.
وخرج مسلم في بث مباشر عبر حسابه الرسمي في “إنستغرام”، ليكشف عن تفاصيل الطلاق، مؤكداً أن السبب وراء الانفصال هو ما وصفه بعدم احترامها له خلال فترة مرضه وغيابه.
قال مسلم: “ده تأكيد للناس إللي طلعت وقالت إني مطلّقتش، وموضوع طلاقي ملهوش علاقة بأهلي ولا أي أحد. أنا طلّقت مراتي لأنها محترمتنيش في غيابي وفي تعبي، وطلعت اتكلمت في حاجات أنا قولت لها متتكلميش فيها. أنا مش واخد أهلي وطلاقي ترند، لأني طول عمري ترند، وفرحي كان ترند، والناس متعاطفة مع يارا من أول المشاكل خالص”.
مسلم يدافع عن يارا ويهاجم أهله
رغم تصريحاته، شدّد مسلم على أن زوجته السابقة كانت إنسانة محترمة وقدّمت له الكثير، قائلاً: “يارا كانت محترمة جداً معايا، وعمرها ما قصّرت في حاجة، إنسانة على أكمل وجه، خدماني في كل حاجة، وكانت بتساعدني في حياتي الشخصية”.
وأضاف: “لكن لسوء حظي أهلي مكنوش جنبي زيادة عن اللزوم، ولا كانوا حنيّنين عليَّ. وأنا عندي 15 سنة سبت البيت وعشت حياتي لوحدي؛ لأن إخواتي كانوا بيمدّوا إيديهم عليَّ لما يشوفوني كويس في حاجة، ويتلمّوا عليَّ ويضربوني وكرّهوني في حياتي. كنت بتضرب وبيتقلل مني وبتهان، وأمي مكنتش بتعرف تتكلم لأن أبويا كان ميت”.
وأكد مسلم أنه تعب كثيراً حتى وصل الى النجاح، لكن عائلته لم ترَ فيه سوى “الفلوس”، موضحاً: “أنا من الناس إللي شقيت جامد، وبعد ما نجحت هُمّه مشفوش مسلم غير فلوس وبس. من أول المشاكل وأنا مبتكلّمش، لكن تعبت من كتر الضغط والكلام إللي زي الزفت بتاعهم”.
وكشف مسلم تفاصيل جديدة عن استغلال أشقائه له، قائلاً: “مصدر رزقي كان الحفلات، ولما وقف ده الدنيا مبقتش أفضل حاجة معايا. إخواتي كانوا بييجوا معايا الشغل يطلبوا حاجات بنص الفلوس إللي بشتغل بيها، وأما أعمل أي مشروع ياخذوا أصحابهم ويطلبوا حاجات ببلاش. ده غير الفضائح إللي بيعملوها ليَّ. ولو ورّيتكم الإسكرينات قد إيه بعثت لأختي فلوس، بس لولا العيبة مش هعمل كده”.
مسلم: “تزوجت بدري لأمنع نفسي من الغلط”
وعن حياته الزوجية، أوضح مسلم أنه تزوج في سنّ صغيرة لحماية نفسه، لكن أسرته كانت سبباً مباشراً في كل طلاقاته السابقة إذ قال: “اتجوزت بدري عشان أمنع نفسي من الغلط، وهمه السبب في كل طلاقاتي. مفيش واحدة اتجوّزتها ومعملوش مشاكل معها. كنت عامل صندوق بحط فيه فلوس لأهلي بعد كل أوردر عشان أوزّع عليهم، لكن وصلوا إنهم عايزين يقعدوا معايا في نفس البيت إللي فيه مراتي رجّالة وستات، وكمان مش عايزينها تتكلم”.
شارك
