رغم تأكيد الفنانة آمال ماهر في أكثر من تصريح لها عدم اهتمامها بالألقاب ومَن هو الرقم واحد أو اثنين، إلا أنها أشعلت مواقع التواصل الاجتماعي بعد طرح أغنيتها الجديدة “رقم واحد”، ضمن ألبوم “حاجة غير”، والتي تضمنت كلمات قوية واثقة، أعاد بها الجمهور الحديث عن مكانتها على الساحة الغنائية.
كلمات أغنية “رقم واحد” لآمال ماهر
وتقول كلمات الأغنية: “بعيش فترة في حياتي كنت أنا نسيتها، بإحساس بنت فرحانة بأنوثتها، تبان واثقة ومن جواها طايقة ومراهقة، في تفكيرها ومشاعرها اللي حسيتها، مع حبيبي لقيتني رجعت من تاني، بغير شكل تسريحتي وفستاني، بجدد حتى لون شعري وبرفاني، وبتمرد على الوحدة وحبستها، أنا اللي وجودها طمنها وغيّرها فحبت نفسها أكتر عشان حباه، كأنها نجمة مطفية ونورها، ثقتها بنفسها رجعت وهي معاه، أنا اللي مكانها مش ممكن هيتاخد، ولو حتى اختفيت ولا بعدت يومين، ما أنا اللي مكانها كان دايماً رقم واحد، ومن بعدي مفيش وماجتش رقم اتنين”.
الكلمات أثارت تفاعلاً واسعاً بين جمهور آمال ماهر، حيث اعتبرها البعض رسالة مباشرة تؤكد من خلالها أنها لا تزال تتربع على عرش الأغنية العربية، رغم فترات الغياب، بينما رأى آخرون أنها تلميحات موجّهة الى زميلات في الوسط الفني، وهي من كلمات نادر عبد الله وألحان زعيم وتوزيع أحمد أمين.
آمال ماهر: “أنا ممكن أكون الرقم 1 عند حد وممكن أكون ولا حاجة عند حد تاني”
وكانت آمال ماهر قد تحدثت عن جدل لقب “صوت مصر”، وعلّقت بأسلوبها الخاص على فكرة إطلاق الألقاب على الفنانين. إذ قالت خلال لقائها في برنامج “أجمد 7”: “مش بحب الكلام في موضوع لقب “صوت مصر” أو أنا رقم واحد، أنا ممكن أكون رقم واحد عندك إنتي وممكن أكون ولا حاجة عند حد تاني، بأي حق أقول أنا رقم واحد وأنا معرفش صوت إيه، بأي حق!”.
وأضافت: “الناس هي اللي بتقيّمك وتحطك في المكان اللي عايزة تحطك فيه، الجمهور هو اللي بيدّي لقب للمطرب، أنا بحب اسمي جداً وبالنسبة ليا اسمي إن الناس حبّاه وعارفاه ده حاجة اتشرّف بيها، كون أن الناس بتلقبك دي حاجة همّا شايفنها وهي حاجة مش وحشة، بس حاجة همّا شايفينك فيها هم شايفينك في حته وحاطينك فيها ودي حاجة بتزوّدك مش بتنقصك، بالعكس دي مرايا ليكي بتعكس قد إيه هما بيحبوكي بس هما اللي يقولوا دا”.
وعن أقرب الألقاب الى قلبها، قالت النجمة المصرية: “حاجات كتير وألقاب كتير اتقالتلي مش فاكرة بس اللي أنا عارفاه أنا بحب اسم آمال ماهر، بيقولوا لي “أميرة القلوب” طالما الناس تشوف كده، هحتاج تاني إيه أكتر”.
شارك
